Organizata Botërore e Shëndetësisë ka shprehur shqetësim për rritjen e infeksioneve Covid-19 në Kinë dhe theksoi se mbështet vendimin e qeverisë për të fokusuar përpjekjet e saj në vaksinimin e njerëzve me rrezik më të lartë në të gjithë vendin, tha sot shefi i OBSH-së.
Numri i infeksioneve është rritur së fundmi në ekonominë e dytë më të madhe në botë dhe parashikimet sugjerojnë se Kina mund të përballet me një shpërthim infeksionesh dhe më shumë se një milion vdekje vitin e ardhshëm.
“OBSH është shumë e shqetësuar për situatën në zhvillim në Kinë, me raporte në rritje të infeksioneve serioze”, u tha gazetarëve drejtori i përgjithshëm Tedros Adhanom Ghebreyesus.
Tedros theksoi se Agjencia ka nevojë për informacion më të detajuar mbi ashpërsinë e situatës, pranimet në spital dhe kërkesat për mbështetjen e njësisë së kujdesit intensiv për të pasur një vlerësim gjithëpërfshirës të situatës.
Më herët sot, qeveria gjermane konfirmoi se kishte dërguar grupin e saj të parë të vaksinave BioNTech Covid-19 në Kinë për t’u administruar fillimisht te emigrantët gjermanë. Kjo është vaksina e parë jo-kineze e koronavirusit që përdoret në Kinë.
Nga ana e tij, Dr. Michael Ryan, kreu i programit të urgjencave të OBSH-së, tha se normat e vaksinimit në Kinë ishin “të papërshtatshme” për një vend të madhësisë së tij, por theksoi se autoritetet kineze shëndetësore kishin bërë përparim në vaksinimet gjatë dy javëve të fundit. Ai i kërkoi Pekinit të importojë më shumë vaksina mRNA.
Në të njëjtën kohë, zyrtari i OBSH-së theksoi se rastet e raportuara të sëmundjes në Kinë mund të jenë larg realitetit aktual, pasi vendi përpiqet të mbledhë të dhëna në kohë reale të Covid-19.
